DAVID AND GOLIATH

ANG BATANG MAGABALANTAY SA KARNERO NGA
MISALIG SA DIOS ~ 1 Samuel 17

Si Haring Saul ug ang iyang mga kasundalohan nagpakigubat batok sa mga kaawayng sundalo. Ang iyang mga sundalo didto sa usa ka bukid samtang ang mga sundalong kaaway didto sa laing bukid. Sa taliwala nila mao ang usa ka walog.

Adunay dakung higante sa mga sundalong kaaway. Goliath ang iyang ngalan. Kusgan si Goliath ug maisug. Nagsul-ob siya sa saput nga bulawan, ug dihay iyang dakung espada sa iyang kilid. Sa iyang kamot dihay mahait nga bangkaw. Si Goliath miadto sa walog nga gitaliwad-an sa iyang mga sundalo ug mga sundalo ni Haring Saul ug misinggit siya sa makusog, “Pagpadala kamog usa ka tawo nga makig-away kanako!...Nagahagit ako kaninyo.!”

Sa pagkadungog niini ni Haring Saul ug sa iyang mga sundalo, nangahadlok sila. Nahadlok silang tanan sa pagpakig-away sa dakung higante. Gikataw-an lang sila ni Goliath ug gibiaybiay niini ang Dios.
Usa ka adlaw si David, ang usa ka batan-on nga magbalantay sa karnero miabut aron sa pagduaw sa iyang mga magulang nga lalaki nga mga sundalo ni Haring Saul. Nadungog niya ang hagit ug singgit ni Goliath. Miingon siya, “Moadto ako ug makig-away sa higante.” Si David wala mahadlok. Misalig siya sa Dios.

Si Haring Saul miingon kang David, “Dili ka makahimo sa pagpakig-away sa higante. Batan-on ka pa.” Apan si David miingon, “Ang Ginoo motabang kanako sa pagpatay niining higante nga nagbiaybiay sa Dios ug sa Iyang mga katawhan.”
Unya si Haring Saul miingon, “Sige, padayon ug ang Ginoo maga-uban kanimo.” Ang espada ug ang bisti sa Hari mabug-at kayo alang kang David, busa gikuha lang ni David ang iyang sungkod ug ang iyang lamboyog ug usa ka bato.

Sa pagkakita ni Goliath kang David nga nagpadulong kaniya, mikatawa lang siya ug miingon, “Iro ba ako nga ikaw mianhi sa pagpakig-away kanako sa sungkod?”
Si David mitubag, “Ikaw mianhi nga nagdala sa espada ug bangkaw, apan ako mianhi kanimo sa ngalan sa Ginoo. Ang Dios motabang kanako sa pagpakig-away kanimo.”

Unya gibutang ni David ang bato diha sa iyang lamboyog ug iya kining gilabyog. Gibuhian niya ang bato gikan sa lamboyog, ug naigo si Goliath diha sa iyang agtang. Si Goliath natumba ug nahiumod sa yuta ug midagan si David ug gipatay niya si Goliath sa kaugalingong espada niini.

Sa pagkakita niini sa mga sundalong kaaway nangahadlok sila ug nandagan. Ang mga sundalo ni Saul misinggit sa umang kalipay, “Ang Dios mitabang kang David sa pagpatay sa higante!”

MEMORY VERSE
Ang among tabang anaa sa ngalan ni Jehova,
Nga nagbuhat sa langit ug sa yuta.
~Salmo 124:8

ALAWITON
AKO DAW GAMAYNG KARNERO,
Ang Dios ang magbalantay ko.
Sa malunhaw nga sibsiban, Iya akong tultolan.

Sa kapakyas ko’g kaluya, gilig-on ug gidasig N’ya,
Sa buhat ko matag-adlaw S’ya akong pasidunggan.
KORO
Buhi, Buhi, Buhi, Buhi ang akong Ginoo,
Buhi, Buhi, Buhi sa kahangturan.

Sa landong sa kamatayon, Ikaw ang akong paglaum,
Kay gamhanan Kang nag-uban aron ako tultolan.


ALANG SA MGA GINIKANAN
Ang Dios mas makusganon kaysa inyong mga kaaway nga inyong maatubang. Ang Dios naghatag kaninyo ug kaisog aron mahimo kamong saksi sa Iyang ngalan ug maghimog maayo bisan panahon sa kakuyaw. Dili kita makapasangil sa atong kaugalingon kong mapakyas kay nadawat nato ang gahum ug kaisog sa pagsaksi sa Dios pinaagi sa pagbasa ug pagpaminaw sa Pulong sa Dios, ug sa pakig-ambitay sa lawas ug dugo ni Jesus diha sa pan ug bino sa Balaang Panihapon. Makanunayon ba ang imong paggamit sa Iyang Pulong ug sa pagdawat sa Iyang lawas ug dugo?

PAG-AMPO
Dearest Jesus, You are our Savior. Deliver us
from evil and forgive our sins. Help us to bring
your Word to others. Amen