ANG BATAN-ONG JESUS DIDTO SA TEMPLO
Lucas 2:41-52
Sa nagpanuigon na si Jesus ug napulog duha ka tuig, giuban Siya sa Iyang mga ginikanan ngadto sa templo sa Jerusalem. Matag tuig dihay mga tawo nga gikan sa nagkalainlaing dapit nga miabut sa Jerusalem aron pagsimba. Nagbaklay lamang sila paingon sa Jerusalem.
Pagkahuman nilag samba, ang mga ginikanan ni Jesus namauli uban sa ilang mga higala. Wala makauban si Jesus kanila apan nagdahum sila nga kuyog ra si Jesus sa panon. Sa pagkagabii gipangita nila si Jesus, apan wala nila Siya hikit-i. Pagkabuntag miagpas sila pagbalik sa Jerusalem.
Tulo ka adlaw ang ilang pinangita kang Jesus. Human sa tulo ka adlaw miadto sila sa templo. Ug didto sa templo nila hikit-I si Jesus nga nakigsulti sa mga magtutudlo. Ang mga tawo nga namati kang Jesus natingala sa Iyang pagpanabut ug sa Iyang pagpanubag.
Giduol ni Maria si Jesus ug gisultihan, “Anak, nganong gibuhatan Mo man kami sa ingon? Gipangita Ka namo sa lainlaing mga dapit.” Si Jesus mitubag, “Nganong gipangita pa man Ako ninyo? Wala ba diay kamo mahibalo nga anhi gayud Ako sa balay sa Akong Amahan?” Angay gayud unta nga sa templo dayon nila gipangita si Jesus tungod kay gisugdan na Niya pagtuman ang kabubut-on sa Iyang Amahan nga mao ang pagluwas sa mga tawo gikan sa ilang mga sala.
Bisan tuod Anak Siya sa Dios, gitahud gihapon ni Jesus si Maria ug si Jose. Miuban Siya pagbalik sa Nazaret. Ug masinugtanon Siya sa Iyang mga ginikanan dinhi sa yuta.
Si Jesus itubo ug nagdaku sa NAzaret. Ang Bibliya naga-ingon, “Si Jesus mitubo sa kaalam ug sa gidak-on ug sa kahimuot Kaniya sa Dios ug sa tawo.”
MEMORY VERSE
“Wala ba diay kamo mahibalo nga anhi gayud Ako sa balay sa Akong Amahan?”
~ Lucas 2:49
ALAWITON
BULAHAN ANG TAWO NGA MAGAPABILIN,
Diha kanunay mamati sa pulong sa Dios,
Unya ikalipay sa kinabuhi N’ya,
Ang paglakaw sa Balaod uban sa Ginoo.
KORO
Ug S’ya mahisama sa usa ka kahoy,
Nga mamunga ug ang dahon dili mangalaya,
Kay mga dautan dili makapildi,
Bisan asa s’ya paingon ang Dios kauban n’ya.
Ug magmauswagon tibook n’yang adlaw,
Kay s’ya wala mahisama sa mga dautan,
Ug gimatarong s’ya atubangan sa Dios,
Tungod sa iyang pagtoo diha sa Ginoo. (KORO)
PAG-AMPO
Among Langitnong Amahan, maski sa pagkabata ni Jesus, Siya nagtuman sa Imong kabubut-on ug nagbuhat alang sa among kaluwasan. Tabangi kami sa pagpuyo nga mapasalamatong pagkinabuhi, makanunayong mamati sa Imong Pulong, ug sa pagtuman dili lang Kanimo kondili uban usab sa mga tawo nga gibutang Mo sa among kiliran nga nag-amoma kanamo. Ug kon kami mapakyas, dad-a kami pagbalik diha Kanimo sa paghinulsol ug pagtoo, magasalig diha sa Imong kapasayloan ug sa Kaluwasan, diin si Jesus Imong bugtong Anak sa Iyang perfectong pagtuman, nakabaton kami. Kami naga-ampo, nagsalig diha kang Jesus, Amen.
ACTIVITY: MAZE
Tabangi ang mga ginikanan ni Jesus sa pagpangita Kaniya. Subaya ang hustong dalan sa hulagway aron Makita nila si Jesus.
Comments
Post a Comment