ANG DIOS NAKIGSULTI KANG SAMUEL

ANG DIOS NAKIGSULTI KANG SAMUEL
1 Samuel 2:12—4-18

Sukad sa bata pa si Samuel, didto na siya nagpuyo sa templo ug mitabang siya kang Eli, ang sacerdote. Buotan siya nga bata ug gihugugma niya ang Dios ug ang balay sa Dios.

Apan si Eli adunay duha ka anak nga lalaki nga dautan. Kanunay nilang gikawat ang halad nga gihatag sa mga tawo sa templo. Nasayud si Eli niini, apan wala niya sila kastigoha. Ug ang mga anak ni Eli midugang ug kadautan matag adlaw. Busa mihukom ang Dios sa pagkastigo kanila sa ilang amahan.

Us ka gabii samatang natulog si Samuel diha sa iyang kwarto sa templo, nakadungog siya sa usa ka tawag, “Samuel, Samuel!” Midagan si Samuel padulong kang Eli ug miingon, “Anaa ako, kay ikaw nagtawag kanako.” Si Eli miingon, “Wala ko ikaw tawga. BAlik ngadto sa imong higdaan ug katulog na.” Busa mibalik si Samuel sa iyang higdaan aron matulog. Apan sa makaduha ka higayon kini nahitabo. Tapus sa ikatolo ka higayon nga pagtawag kang Samuel nasayud si Eli nga ang Dios maoy nagtawag kang Samuel. Busa iyang giingnan si Samuel, “Lakaw ug mohigda ka. Ug kon tawgon ka usab, ikaw moingon, ‘Sulti, Ginoo, kay ang Imong sulogoon namati.”

Gisunod ni Samuel ang mga pulong ni Eli. Mibalik siya sa iyang higdaan. Ug tapus ang Ginoo mitawag, “Samuel! Samuel!” si Samuel mitubag, “Sulti, Ginoo, kay ang IMong sulogoon namati.

Ang Dios misulti kang Samuel, “Si Eli nakasala sa hilabihan. Nasayud siya nga mga dautan ang iyang mga anak apan wala siya mokastigo kanila. Busa Ako siyang kastigohan ug ang iyang mga anak.”

Wala madugay, human niini, ang duha ka mga anak ni Eli namatay sa gubat. Sa pagkadungog ni Eli sa balita nahayang siya gikan sa iyang gilingkoran ug nabunggo ang iyang liog ug namatay siya. Mao kana ang kastigo sa Dios kanila. Unya si Samuel nahimong sacerdote ug magmamando sa mga tawo sa Dios puli kang Eli.

MEMORY VERSE
"Bulahan pa hinoon ang mga nagapatalinghug sa pulong sa Dios ug nagabantay niini!" ~Lukas 11:28

ALAWITON
BULAHAN ANG TAWO NGA MAGAPABILIN,
Diha kanunay mamati sa pulong sa Dios, Unya ikalipay sa kinabuhi N’ya,
Ang paglakaw sa Balaod uban sa Ginoo.
KORO
Ug S’ya mahisama sa usa ka kahoy, nga mamunga ug ang dahon dili mangalaya,
Kay mga dautan dili makapildi, bisan asa s’ya paingon ang Dios kauban n’ya.

ALANG SA MGA GINIKANAN
Atong Manluluwas nag-ampo ngadto sa Iyang Langitnong Amahan, “Ug ang kinabuhing dayon mao kini ang ilang pagpakaila kanimo nga mao ang bugtong tinuod nga Dios, ug kang Jesu-Cristo nga imong pinadala.” (Juan 17:3) Kinahanglan gayud nga ang katawhan mahibalo ug masubayan sa pagtoo diha sa matuod nga Dios ug Iyang bugtong Anak nga si Jesus. Si kinsa ang gababag sa maong kahibalo ug pagtoo makasuko sa Dios. Sama sa kaso ni Eli ug ang iyang mga anak nga lalaki. Ang Dios nahibalo unsay mahitabo ug nagaplano na sa mga umaabot nga tuig kon unsaon Niya pagwagtang kanila ug paghatag ug usa ka bag-ong spirituahnong mangungulo alang sa Iyang katawhan.

Ang kalibutan wala nausab. Kasagaran daghan ang mga dili matinud-anon nga mga pastors ug magtutudlo. Ang Dios nagahatag ug pamaagi diin ang mga tawo maprotektahan nila ang ilang kaugalingon gikan sa mga mini nga mga magtutudlo. Siya nagahatag kanato sa Iyang Pulong—Ang Bibliya—diin nahibaloan nato ang kamatuoran. Kon ikompara nato ang atong nadungog ug nabasa sa unsay gisulti sa Balaang Pulong, makasulti kita sa matuod gikan sa sayop. Suportahan ta unsay nahiuyon diha sa Balaang Pulong. Likayan ta unsay sukwahi sa Balaang Pulong. Kita mag-ampo nga ang Dios maghatag kanato ug mga matinud-anon nga mga pastors ug magtutudlo.

PAG-AMPO
Among langitnong Amahan, gihatagan Nimo kami sa Imong Pulong. Nini, naga-giya Ka kanamo sa pagpuyo sa among kinabuhi nga makapahimuot Kanimo. Ikaw naga-giya kanamo sa pagtoo sa Imong Anak nga si Jesu-Kristo nga mao ang Manluluwas gikan sa sala ug sa walay katapusang silot sa impyerno. Sa dihang gihatagan Mo ang mga Israelita ug usa ka matinud-anon nga magtutudlo nga si Samuel, hatagi usab kami ug matinud-anong pastors ug magtutudlo sa pagtudlo kanamo sa dapat namong tuohan diha uyon sa Imong Pulong. Kami naga-amp sa ngalan ni Jesus. Amen.